ISANG Joint Memorandum Circular (JMC) ang nilagdaan ng Technical Education and Skills Development Authority (TESDA), Department of Migrant Workers (DMW), Department of Labor and Employment (DOLE) at Overseas Workers Welfare Administration (OWWA) upang palawakin ang mga skills-to-employment pathways para sa returning overseas Filipino workers (OFWs).
Pinirmahan nina TESDA Director General Secretary Jose Francisco “Kiko” B. Benitez, DMW Secretary Hans Leo J. Cacdac, DOLE Secretary Francis “Tol” N. Tolentino, at OWWA Administrator Patricia Yvonne Caunan ang nasabing JMC sa DMW Central Office noong Lunes, Hulyo 20, 2026.
Layunin nitong isatuntunin (institutionalize) ang mas malawak na pagpapatupad (expanded rollout) ng “Kaalaman Tungo sa Kabuhayan” (K2K) Initiative sa ilalim ng National Reintegration Program.
Ang JMC ay nagtatag ng isang whole-of-government framework na nag-uugnay sa mga programa at serbisyo ng iba’t ibang ahensya upang patatagin ang muling pagpapanumbalik (reintegration) ng mga OFW sa pamamagitan ng:
- Pagsasanay at pagpapaunlad ng kasanayan (skills development)
- Pagsusuri at pagpapatunay ng kakayahan (competency assessment and certification)
- Pagtulong sa paghahanap ng trabaho (employment facilitation)
- Mga pagkakataon para sa napapanatiling pangkabuhayan (sustainable livelihood opportunities)
“Ipinapakita ng K2K Initiative ang ating commitment to empowering returning OFWs sa pamamagitan ng mga kasanayan, oportunidad, at suporta mula sa pamahalaan na kailangan nila upang matagumpay na makabalik at makapag-ambag sa ekonomiya ng Pilipinas,” pahayag ni Cacdac.
“Sa ilalim ng utos ng Pangulo, gumagawa tayo ng mas matibay na daan tungo sa disenteng trabaho at napapanatiling pangkabuhayan para sa ating mga makabagong bayani at sa kanilang mga pamilya,” dagdag pa niya.
“Kung titingnan mo ang mga daan ng reintegrasyon, magkakaroon ng bahagyang pagtaas sa empleyo, lalo na kung magiging matagumpay ang pagpapatupad ng JMC,” ayon naman kay Tolentino.
“Tinitingnan natin ang mga OFW na nagbabalik matapos ang kanilang kontrata at trabaho. Ngayon, pinag-uugnay natin ang agwat sa pagitan local employment at global employment,” sabi naman ni Benitez.
Binuo batay sa matagumpay na pilot implementation ng K2K Initiative sa ilang piling rehiyon noong nakaraang bahagi ng taon, pormal na inilunsad ng JMC ang patuloy na pagpapalawak ng programa upang maabot ang mas marami pang nagbabalik na OFW sa buong bansa.
Sa pamamagitan ng pakikipagtulungang ito, ang mga OFW at ang kanilang mga pamilya ay magkakaroon ng mas malawak na access sa:
- Pagsasanay na angkop sa pangangailangan ng industriya (industry-responsive training)
- Pagpapaunlad ng digital at teknikal na kasanayan (digital and technical skills)
- Pagsusuri at sertipikasyon ng kakayahan (assessment and certification)
- Pagtutugma sa mga bakanteng trabaho (job matching)
- Iba pang mga serbisyong tumutulong sa muling pagbabalik sa lipunan at ekonomiya
Bilang isang pangunahing inisyatibo para sa reintegrasyon at employment ng mga OFW, ipinapakita ng K2K ang komitment ng pamahalaan na magkaloob ng mga pagkakataon para sa panghabambuhay na pagkatuto, disenteng trabaho, at maayos na muling pagpapanumbalik sa lipunan.
Sa mas pinalakas na pagtutulungan ng TESDA, DMW, DOLE at OWWA, layunin ng inisyatibong ito na tiyaking mas maraming OFW at kanilang pamilya ang makikinabang sa mga pinagsamang programa na nagtataguyod ng produktibong trabaho at pangkalahatang pag-unlad ng ekonomiya.
