KASADO na ang pangunahing family-oriented na tabletop gaming event sa Pilipinas, ang ‘All aBOARD Expo ’26 na gaganapin sa Quezon City mula Mayo 28 hanggang Mayo 31, 2026.
Sinabi ni Giana Aira Barata, Offier-in-charge ng City Tourism Office ng lungsod at bilang kinatawan ni Mayor Joy Belmonte, na binigyang-diin ng event na ito na magpapatibay pang lalo ang buklod ng pamilya dahil magkasamang gugugol ng oras ang buong pamilya.
Ayon pa kay Belmonte, layunin din nito na palakasin pa ang critical thinking ng mga bata sa iba’t ibang board games na ilalatag at tiyak na mag-i-enjoy ang buong pamilya.
Maglalaan ng libreng sakay gamit ang QCity Bus mula Cubao, Litex, General Luis, Mindanao Avenue, Gilmore, C5 (Ortigas Exit) at Muñoz patungo sa M.I.C.E. Center.
Nakipag-partner din ang lokal na pamahalaan sa mga hotel tulad ng Seda upang makakuha ng diskwento sa mga room rates para sa mga bisita na sasali mula sa labas ng Quezon City.
Tampok sa nasabing event ang laro na “Kalikasan,” ang Philippine edition ng Cascadia kung saan ikikintal sa isipan ng mga bata ang kahalagahan ng pangangalaga sa kalikasan.
May board game din na “Sinigang,” kung saan lalaruin ng mga bata ang tungkol sa paggawa ng pinakamahusay na sinigang, at “Modern Art,” pinagsamang sining matematika at science gamit ang mga obra maestra ng National Artists na sina Larry Alcala at Federico Aguilar.
Libre ang admission sa event na ito para sa mga QCitizens gayundin sa mga kabataan edad 12 pababa ngunit may minimal fee na P150 para sa mga hindi residente ng lungsod.
