INARESTO ng National Bureau of Investigation-Cybercrime Division (NBI-CCD) ang isang lalaki sa Maynila matapos umanong ilegal na i-access at ipakalat ang sensitibong video na kinasasangkutan ng isang menor de edad.
Ayon sa NBI, isinampa ang reklamo noong Pebrero 20, 2026 kaugnay ng paglabag sa Republic Act 11930 o Anti-Online Sexual Abuse or Exploitation of Children at Anti-Child Sexual Abuse or Exploitation Materials Act, at Republic Act 10175 o Cybercrime Prevention Act of 2012.
Sa imbestigasyon, nangyari umano ang insidente noong Pebrero 7, 2026 sa isang birthday party.
Ginamit umano ng suspek ang cellphone ng biktima sa pag-aakalang kukuha lamang ng litrato, sa halip pinasok nito ang isang pribadong folder at nakuha ang sensitibo ng video ng biktima na kuha pa noong siya ay menor de edad.
Lumabas sa ulat na ipinadala ng suspek ang naturang video sa pamamagitan ng Facebook Messenger at kalaunan ay ipinakalat pa sa group chat na naging sanhi ng mabilis na pagkalat nito sa kanilang barangay at paaralan.
Sa isinagawang cyber surveillance, natukoy ng NBI-CCD ang lokasyon ng suspek sa Sikat Street, San Miguel Maynila. Dito isinilbi ang Warrant to Search, Seize, and Examine Computer Data.
Narekober sa operasyon ang mga digital na ebidensya na tumutukoy sa ilegal na pag-access at pagpapakalat ng naturang materyal.
Kasalukuyang nasa kustodiya ng mga awtoridad ang suspek at nakatakdang isailalim sa inquest proceedings sa Office of the City Prosecutor ng Maynila. (AR BERNARDO)
