LAKING pasasalamat ng isang biktima sa mga operatiba ng Taguig PNP dahil sa mabilis nitong pagresponde sa nangyaring pagnanakaw sa Taguig City, Abril 12, 2026.
Ayon sa biktimang si Jerome Yabut ng Ususan, Taguig City Malaki ang kaniyang pasasalamat dahil sa mabilis na pagresponde ng Police Substation 4 Ususan sa isang insidente ng pagpasok ng dalawang hindi awtorisadong indibidwal sa kanilang tahanan bandang alas-3:30 ng madaling araw.
Sinabi ni Yabut na rumesponde agad ang mga pulis sa loob lamang ng humigit-kumulang 10 minuto matapos ang insidente at kaagad na kumilos upang imbestigahan ang pangyayari.
Dahil sa mga CCTV footages mula sa Barangay Ususan at Barangay Tuktukan, natunton ang galaw ng mga suspek hanggang sa matukoy ang kanilang pinagtataguan sa Bagong Calzada Cemetery.
Agad na isinagawa ang follow-up operation na nagresulta sa pagkakaaresto sa mga suspek at pagkakabawi sa mga ninakaw na mga cellphone.
Sagot naman ng Taguig City Police, ang tiwala ng mamamayan ay nagsisilbing inspirasyon nila upang ipagpatuloy ang kanilang mabilis at maayos na serbisyo para sa kaligtasan ng publiko. (AR Bernardo)
