SALUDO tayo sa Metropolitan Manila Development Authority o MMDA dahil sa maagap nilang pagtugon sa mga pangangailangan ng mga mamamayan ng Kalakhang Maynila hindi lamang sa isyu ng trapiko kundi maging sa paglilinis at pagbabalik sa ayos sa idinulot ng masamang panahon.
May napansin lang tayo nang mag-browse ang inyong lingkod sa social media page ng ahensya kung saan may mga larawan ng masisipag nilang mga tauhan na nagtitibag ng mga natumbang kongkretong pader, nagpuputol ng mga natumbang kahoy sa kalsada at iba pa.
Ito ay ang kawalan ng safety shoes at safety helmet o hard hat at iba pang basic personal protective equipment (PPE) sa tuwing magsasagawa sila ng mga gawaing binanggit natin.
Wala tayong datos sa kung ilan na ang nagtamo ng sugat o naaksidente dahil sa kawalan ng PPE ng mga MMDA personnel, pero sabihin na nating napakakaunting porsyento lamang, pero ang isyu pa rin ay ang kaligtasan.
Hindi natin alam, baka ang maliit na sugat na iyon ay lalala lalo na’t nakaugalian na ng mga Pilipino, partikular na ng mga kalalakihan, na ipag-walang bahala na lang ang mga minor wounds at sasabihing: “malayo ito sa bituka.”
Sa inilabas na online poster ng Department of Public Works and Highways (DPWH) at alam naman nating applicable din ito sa MMDA, makikita ang larawan ng kumpletong basic PPE na kung saan ito ay inaasahan nating istriktong ipinatutupad ng Kagawaran.
Hiling natin sa mga kinauukulan na huwag itong ipagwalang-bahala at gayakan ng kumpletong kagamitang pagkaligtasan ang kanilang mga tauhan upang maging modelo din ito sa mga mamamayan. Hindi lingid sa atin na istriktong ipinatutupad ng MMDA at hinuhuli ang mga motorcycle rider, pati ang angkas nito, kapag nakasuot lamang ng tsinelas, at siyempre kapag walang helmet.
Ang isyu ay ang kaligtasan pa rin dahil hindi lamang iyon ang tama, kundi iyon ang dapat.
