PARANG, Maguindanao del Norte—Makikipagtagisan ng husay at galing ang 4,600 atletang mag-aaral mula sa iba’t ibang paaralan para sa Bangsamoro Autonomous Region in Muslim Mindanao Athletic Association o BARMMAA Meet 2026 simula ngayong araw, Abril 12, 2026.
Nagsimula ang taunang isport sa isang magara at makulay na “Parada ng mga Atleta” na nagmula sa iba’t ibang lalawigan at lungsod na nasasakupan sa rehiyon ng Bangsamoro.
Inorganisa ang BARMMAA Meet 2026 sa pangunguna ni Minister Mohagher M. Iqbal ng Ministry of Basic, Higher and Technical Education (MBHTE).
Aabot naman sa humugit-kumulang sa 7,000 katao—kasama ang mga atleta—ang bilang ng buong delegasyon o kalahok sa tagisan ng talino at galing na mula sa 10 schools’ division office (SDO) ng rehiyon.
Kalakip sa nasabing delegasyon ang libu-libong mga mag-aaral, atleta, coaches, at lider ng edukasyon sa ngalan ng pagkakaisa, disiplina, at kahusayan.
Tulad sa mga nakaraang taon, maliban sa makakatanggap ng cash prize ang mga mananalo sa iba’t ibang katergorya sa isport, mayroon din tatanghaling muli na mga mananalo sa ‘Parada ng mga Atleta’ tulad ng best in uniform, best in salute, best delegation, at most friendly delegation.
Nagsimula ang Parada ng mga Atleta bandang alas-4 ng hapon at inabot na hanggang gabi.
Ang paligsahan sa mga sports events ay magsisimula sa Lunes, Abril 13, at magtatapos sa Abril 17 kasama na ang awarding sa mga natatanging atleta.
Ang mga kampeon sa iba’t ibang kategorya at iba pang mga mananalo ay maghahati-hati sa Php1-milyon cash fund na galing sa MBHTE, kasama rin ang mga tropeo, medalya, at ang karangalan na katawanin ang BARMM sa 2026 Palarong Pambansa.
Maglalaban-laban ang mga atleta sa iba’t ibang kategorya tulad ng archery, arnis, athletics, badminton, baseball, boxing, chess, basketball, billiards, football, futsal, para-games, pencak silat, sepak takraw, softball, swimming, table tennis, taekwondo, tennis, volleyball, wrestling, at wushu.
Ang BARMM ay kinabibilangan ng mga probinsya ng Basilan, Lanao del Sur, Maguindanao del Norte, Maguindanao del Sur, Tawi-Tawi; syudad ng Cotabato, Lamitan, Marawi; at Special Geographic Area (SGA) na meron walong munisipyo ng North Cotabato. (Ni Edd K. Usman)
