ARESTADO ang 9 katao sa pinaigting na kampanya ng Rizal Police Provincial Office (Rizal PPO) laban sa ilegal na sugal sa isinagawang operasyon sa Brgy. Bagong Nayon, Antipolo City, Abril 9, 2026.
Sa pangunguna ni PCol. Eleazar Barber, provincial director ng Rizal PPO, naaresto ang mga rebisador, kabo, at kolektor na sangkot sa operasyon ng huweteng, isang uri ng ilegal na sugal, sa lungsod.
Kinilala ni Eleazar ang mga suspek na “rebisador” na sina alyas Rog 48; alyas Jer, 44; alyas Rose, 37, na nagsisilbi rin bilang babaeng “kristo” at “verifier.”
Tiklo rin ang dalawang “kabo” na sina alyas Rene, 57 at alyas Er, 34, na nagsisilbi rin bilang bet collector, samantalang assistant cook naman si alyas Ern, 56.
Sangkot din ang tatlo pang mga kasabuwat na sina alyas Erald, 42; alyas Son, 57, at alyas Tom, 69 na pawang mga residente sa lalawigan ng Rizal.
Nakuha mula sa mga suspek ang iba’t ibang gambling paraphernalia, mga mobile phone, mga calculator, notebook, lastillas, iba pang betting materials at P5,315 na taya.
Kaagad na isinagawa ng mga operatiba ang nasabing operasyon matapos makatanggap ng impormasyon hinggil sa operasyon ng huweteng sa nasabing lungsod.
Nahaharap sa mga kasong paglabag sa Presidential Decree No. 1602 at Republic Act 9287 bilang amyenda sa PD 1602 na nagtatakda ng mas mataas na multa at parusa sa nasabing ilegal na gawain.
Ang mga suspek ay kasalukuyang nakapiit sa custodial facility ng Antipolo Component City Police Station (Antipolo CCPS) habang inihahanda ang isasampang mga kaso sa Rizal Prosecutors Office.
