ISUSULONG ni Senador Sherwin Gatchalian ang isang panukala na magbabawal sa mga kumpanya na dating pagmamay-ari ng mga pulitiko na sumali para makakuha ng infrastructure projects sa gobyerno kasali na ang may kinalaman sa flood control.
Sinabi ni Gatchalian na kapag ito’y maisabatas, magkakaroon na ng panibagong reporma kung paano ipapatupad ang mga proyekto ng pamahalaan at magiging epektibo na ang pagresolba sa problema sa korapsyon.
Ayon pa sa mambabatas, nagiging palusot na lamang umano ng mga pulitiko na nag-divest na kunyari sila sa kumpanya na dati nilang pagmamay-ari para lang makasali sa mga proyekto ng pamahalaan.
Giit pa ng senador, nalaman umano niya na batay sa kamakailang mga ulat ang ilang mga pulitiko na may nagpanukala ng isang government projects sa distrito nito ay siya ring nagsisilbing contractor ng nasabing proyekto kung saan kitang-kita umano na may conflict of interest.
“May mga ulat na ilang politiko ay sangkot o nasa likod ng mga ghost projects o ang tinatawag kong ‘ampaw’ projects. Kailangan nating suriin ang kanilang koneksyon sa maanomalya na mga proyektong ito,” saad ni Gatchalian.
Inihayag pa ng mambabatas na malaki aniya ang magiging epekto nito sa kung papaano ang magiging kabuuang larawan ng susunod na national budget lalo na’t siya na ang chairman ng Senate Finance Committee.
“Tandaan natin na 9,000 proyekto ang ating pinag-uusapan dito at hindi lang may kinalaman sa flood control. Kasama rin dito ang mga kalsada, highways, at iba pang infrastructure developments,” ayon pa sa senador.
