KAPANSIN-PANSIN na ang Blue Ribbon Committee—na inaasam-asam ng marami—ay napunta sa bagitong senador na si Rodante Marcoleta, na ayon sa marami ay “dasurv” nito dahil maliban sa isa itong abogado, matagal itong nanungkulan bilang kongresista at hinangaan sa pagganap nito sa mga imbestigasyon partikular na sa mga kasong katiwalian sa gobyerno.
Pangunahing tungkulin ng Blue Ribbon ay ang pag-iimbestiga sa mga alegasyon ng katiwalian na ginawa ng isang opisyal at ahensya ng gobyerno lakip na ang opisina ng Bise-Presidente at mismong si VP Sara Duterte.
Dahil dito marami ang nag-aabang sa kung ano ang magiging hakbang ni Marcoleta sakaling dumating ang panahon na may gagawa ng inisyatiba na imbestigahan si VP Sara.
Ito’y matapos sabihin na Senate President Chiz Escudero na susundin nila ang kamakailang desisyon ng Korte Suprema na hindi ayon sa Saligang Batas ang Articles of Impeachment na ipinadala sa kanila ng Mababang Kapulungan ng Kongreso.
Sinabi pa ng Katas-taasang Hukuman na sa Pebrero 6, 2026 pa puwedeng maghain uli ng impeachment complaint laban sa Pangalawang Pangulo sa Mababang Kapulungan ng Kongreso dahil ang pang-apat at pinakahuling complaint ay may petsang Pebrero 25, 2025.
