MAGANDANG balita ang sumalubong sa mga estudyante nagyong umaga, Hunyo 20, nang ikinasa ng Department of Transportation (DOTr) ang 50% diskwento sa pamasahe sa tren.
Ayon kay DOTr Secretary Vince Dizon, maliban sa valid school ID, maaari ring ipakita ng mga estudyante kahit ang proof of enrollment sa ticket booth para sa nasabing diskwento.
Sinabi pa ng kalihim na sakop sa nasabing diskwento hindi lamang ang mga nasa basic education at college level kundi pati na rin ang mga kumukuha ng master’s degree at law school mula Lunes hanggang Linggo pati na rin tuwing holidays.
“Magdadagdag tayo ng discount para sa lahat ng estudyante gamit ang LRT-1, LRT-2 at MRT-3. Yung dating 20% discount lang, inutos ng ating Pangulo na gawin itong 50%,” ang pahayag ni Dizon.
“Simula ngayong araw, 50 percent na ang discount ng ating mga estudyante. Tuloy-tuloy na ito,” pahayag ni Dizon sa mga mamamahayag nang pasinayaan ito sa LRT2 Antipolo Station.
Ipatutupad sa kasalukuyan ang diskwento sa mga single-journey tickets lamang at hindi pa sa Beep cards, ngunit tiniyak ni Dizon na malaking ginhawa ito sa libu-libong estudyanteng araw-araw sumasakay sa tren.
Inihayag pa ni Dizon na ang diskwento ay batay sa direktiba ni Pangulong Ferdinand Marcos Jr. upang maibsan ang pinansiyal na pasanin ng mga magulang lalo na ngayong pasukan.
“Malaking tulong ito sa mga estudyante at kanilang mga pamilya, lalo na sa gitna ng mataas na gastusin sa araw-araw,” dagdag pa ng kalihim.
