Impeachment court ‘di tinabla ng Kamara—Zamora

MARIING pinabulaanan ni San Juan City Congresswoman Ysabel Maria “Bel” Zamora ang akusasyon na tinabla umano ng Mababang Kapulungan ng Kongreso ang kautusan ng impeachment court.

Sa pagdiriwang ng ika-127 Araw ng Kalayaan sa Pinaglabanan Shrine, sinabi ni Zamora na bilang miyembro ng House prosecution team, alam niya umano na wala silang magagawa kundi ang tumalima sa direktiba ng impeachment court.

“Hindi namin kinokontra ang impeachment court tulad ng pahiwatig ni Senate President Francis “Chiz” Escudero. Bilang mga taga-usig, kailangan naming magpasakop sa ilalim ng batas. At ang aming mga aksyon ay saklaw ng impeachment court,” ang pahayag ni Zamora.

Sa kabila nito, nanindigan ang mambabatas na walang awtoridad sa ilalim ng konstitusyon ang Senado na ibalik sa Mababang Kapulungan ng Kongreso ang ipinasa nilang articles of impeachment.

“Wala sa Saligang Batas na maaari nilang ibalik o isauli ang articles of impeachment. Isa pa, nag-isyu na sila ng mga summons kaya para saan pa ang pagbalik nila ng articles of impeachment,”? ayon pa sa mambabatas.

“Ano ang isasama nila sa summons? Siyempre, kailangan nilang ilakip ang articles dahil ito mismo ang dapat sagutin ni Vice President [Sara Duterte] na inaasahan natin. Kahit na hindi ito espisipikong binabanggit ng kanilang patakaran, wala pa rin silang awtoridad. Yan ang aming posisyon,” dagdag pa ni Zamora.

Idinagdag pa ni Zamora na sa ilalim ng Saligang Batas, kapag isinumite na ng Kongreso ang articles of impeachment, kaagad na simulan ng Senado ang pagdinig dito.

Ayon pa sa babaeng mambabatas, sinunod nila ang kanilang mga patakaran at na para bang kinuwestiyon sila ng Senado sa pag-isyu nito ng resolusyon para lang linawin di-umano sa kanila kung sinunod ba nilang ang konstitusyon.

About Author

Show comments