Abalos: Para bumaba presyo ng kuryente, tax sa krudo tanggalin

IMINUNGKAHI ni Atty. Benjamin “Benhur” Abalos Jr., isang kandidato sa pagkasenador, na alisin ang buwis sa krudong ginagamit lamang para sa power generation.

Aniya, makatutulong ito sa pagpapababa ng presyo ng kuryente, pag-akit ng mas maraming kumpanyang pang-manupaktura, at paglikha ng trabaho para sa mga Pilipino.

Sa harap ng kanyang mga tagasuporta sa lalawigan ng Cavite, binigyang-diin ni Abalos na matagal nang hadlang sa kompetisyon ng bansa ang mataas na presyo ng kuryente, lalo na sa sektor ng pagmamanupaktura.

Ang Cavite ay tahanan ng humigit-kumulang 55 economic zones at industrial estates sa ilalim ng Philippine Economic Zone Authority (PEZA).

Iginiit din ni Abalos na ang murang kuryente at isang business-friendly na kapaligiran ang susi sa pagpapalakas ng sektor ng pagmamanupaktura at paglutas sa kawalan ng trabaho.

“Kung aalisin mo ang buwis sa fuel na ginagamit exclusively for power generation, bababa ang presyo ng kuryente. At kapag bumaba ang presyo ng kuryente, papasok ang manufacturing firms—ibig sabihin, trabaho para sa mga Pilipino,” ayon sa dating DILG secretary.

“Kung gusto mong dumami ang trabaho, kailangan marami kang factories, marami kang negosyo. Sinasabi ko na ito noon pang 2005—tutol ako sa VAT sa kuryente,” saad pa ni Abalos.

Itinuro ni Abalos na ang singil sa kuryente sa Pilipinas ay isa sa pinakamataas sa Asya, kaya nagiging hindi kaakit-akit ang bansa sa mga posibleng mamumuhunan.

“Yung excise tax natin sa fuel ay nasa 30%. Ipagpalagay na lang natin na ‘yong fuel na ito ay ginagamit sa power generation, kung tatanggalin natin ang buwis sa fuel purely used for power generation, bababa talaga ang singil sa kuryente,” ayon pa sa dating chairman ng MMDA.

“This was what I stood for when I was a congressman in 2005, and I still stand by it today. We need comprehensive solutions to create jobs and lift more Filipinos out of poverty,” saad ni Abalos.

Ipinunto ni Abalos, halimbawa, na ang mga isla at lalawigang umaasa sa mga diesel-powered generator ay nagbabayad ng mas mataas na singil sa kuryente—umaabot mula P17 hanggang P19 kada kilowatt-hour—kumpara sa average na humigit-kumulang P11 sa Metro Manila.

Kung mahalal bilang senador, nangako si Abalos na isusulong niya ang batas na mag-aalis ng value-added tax (VAT) sa kuryente at mga buwis sa krudong ginagamit lamang para sa power generation.

Binigyang-diin din niya na ang mga hakbang upang mapababa ang presyo ng kuryente ay dapat sabayan ng mas malawak na reporma upang mapabuti ang business environment, kabilang ang digitalisasyon ng mga serbisyo ng gobyerno upang mapabilis ang mga proseso para sa negosyo.

About Author

Nep Castillo

See author's posts