ANG isang diskwalipikadong kandidato ay maaaring maghain ng apela sa Korte Suprema upang makakuha ng Temporary Restraining Order (TRO), ngunit hindi ito nangangahulugan na mali ang Comelec.
Ito ang binigyang-diin ni Comelec Chairman George Erwin Garcia sa isang media forum kamakailan sa San Juan City kung saan pansamantala nilang inihinto ang pag-imprinta ng mga balota para sa nalalapit na halalan dahil sa mga sunod-sunod na inisyung TRO ng Korte Suprema.
“It is part of a legal process where a “presumption of legality” is such that a disqualification of a candidate or declaration of a nuisance candidate is within the mandate of the Comelec,” saad ni Garcia.
Tiniyak din ni Garcia na kailangan nilang sundin ang Katas-taasang Hukuman kung iniutos nito na ilagay sa balota ang pangalan ng isang kandidato na idineklara nilang nuisance candidate dahil nakakuha ito ng TRO.
Ngunit sinabi ng hepe ng Comelec na hindi pa rin sila magdadalawang-isip sa pagdiskwalipika ng isang kandidato at ideklara nilang “nuisance candidate” dahil may sinusunod anila silang probisyon sa Omnibus Election Code, ang Section 69.
Sinipi ni Garcia ang kaso ng noo’y gobernador ng Negros Oriental na si Gov. Degamo kung saan kahit nahalal aniya itong muli sa nakaraang halalan ngunit idineklara ng Korte Suprema ‘with finality’ na “nuisance candidate.”
Sinabi pa ng Comelec na umabot sa 960 ang kabuuang pahina ng kanilang panukala para rebisahin ang Omnibus Election Code at isinumite nila ito sa 19th Congress.
Giit pa ni Garcia: “The Comelec should balance everything, noting that ‘equal opportunity for all’ [is applicable]. Walang magagawa ang Comelec kundi sumunod sa iniutos ng Korte Suprema.”
Sa kasalukuyan, ani Garcia, ay “nalinis” na nila ang listahan ng mga senatorial candidates mula 183 tungo sa 67 na lamang dahil idineklara nilang nuisance candidate ang 117.
Sa kabuuang, 72 milyong balota ang kailangang iimprinta ng Comelec o 1.5 milyong balota bawat araw upang magamit sa halalan sa Mayo 12, 2025.
