PITONG Pilipino ang nawawala at 22 ang nailigtas sa Gaza Strip habang lalong umiinit ang
digmaan sa pagitan ng Israel at ang Hamas, isang militanteng Palestinian group.
Ayon sa ulat ng Philippine Embassy (PhilEm) sa Tel Aviv, isa sa 22 nailigtas ay ginamot sa
isang ospital sa Beersheba, samantalang ang isa ay ginamot dahil sa smoke inhalation, pero
kinalaunan ay pinalabas na. Dinalaw ng labor attaché at welfare officer ng embahada ang
dalawa.
Ayon sa News5, isang Pilipinong caregiver, si Gallenor Pacheco, ang kumpirmadong dinukot
ng grupong Hamas. Positibo siyang kinilala ng kanyang misis na si Clarice Pacheco, matapos
mapanood ang video nito sa social media.
Samantala, kinilala ng Overseas Workers Welfare Administration (OWWA) ang mga nawawala
na sina Grace Cabrera, Shelly Romillo, Norilyn Babadilla, Gallenor Leandro Pacheco at Loreta
Alacre.
Apat sa mga nailigtas ang kinilalang sina Loreta de Costa, Buena Besol, Marilyn Magana at
Joey Fasulingan. Si Fasulingan, na mula sa Cagayan Valley, ay tinamaan ng bala at
nagpapagaling na ngayon sa Ichilov Hospital in Tel Aviv.
Ayon sa Department of Foreign Affairs (DFA), 25 sa 137 mga Pilipino sa Gaza Strip ang
humiling na mailikas sila. Ito ay sa harap nang pagbabanta ng Israel Defense Forces na
pupulbusin ang lahat nang pinagtataguan ng grupong Hamas.
Ayon sa PhilEm, mayroong 30,000 Pilipino na nagtatrabaho at naninirahan sa Israel, kabilang
ang 300 agricultural students na nag-aaral sa bansang ito.
Ayon sa CBS news, umabot na sa mahigit 1,000 ang napapatay sa digmaan, 256 dito ay
mamamayan ng Israel, at mahigit 2,150 ang nasaktan sa magkabilang panig.
Bukod sa datos na ito, ibat’t ibang bansa ang nag-ulat na napatay, dinukot, o nawawala ang
kani-kanilang mamamayan. Kabilang dito ang Brazil, Britain, France, Germany, Ireland,
Mexico, Nepal, Thailand at Ukraine.
