INIANUNSYO ng Land Transportation Office (LTO) kahapon, na nagkaroon nang automatic
extension ang lahat ng driver’s license sa buong bansa hanggang sa Abril 2, 2024.
Sakop nito ang lahat ng mga lisensya na nag-expire magmula noong Abril 3, 2023 hanggang sa
kasalukuyan.
Ayon kay LTO Asst. Secretary Vigor Mendoza II, ang mga lisensya na sakop ng utos ay hindi na
raw dapat magpunta sa tanggapan ng ahensya para tatakan ang kanilang driver’s license o
magbayad ng fee.
Inabisuhan na raw nila ang lahat ng implementing agencies sa buong bansa, gaya ng Philippine
National Police (PNP), MMDA, at mga lokal na pamahalaan, para maiwasan ang inconvenience ng
mga motorista.
Ayon pa kay Mendoza, kaya raw nagsimula ang automatic extension noong Abril 3, ay dahil dito
raw nagsimula ang kakulangan sa plastic-type driver’s license.
Matatandaang nabimbin ang pagre-release ng plastic-type driver’s licenses dahil sa temporary
restraining order (TRO) na iniutos ng Korte, matapos magreklamo ang natalong bidder sa
paggawa ng lisensya.
Nilinaw ni Mendoza na bibigyan daw nang sapat na panahon ang bawat expired license holder
para mag-renew ng kani-kanilang lisensya – matapos maalis ang TRO – para hindi magkasabay-
sabay ang pagre-renew. Bibigyan daw ng priority ang mga OFW at mga nagtatrabaho bilang
drivers.
Tinatayang lomobo sa mahigit 1.7 milyon ang backlog o kakulangan ng driver’s licenses sa buong
bansa dahil sa TRO.
