INANUNSYO ng Department of Health-Epidemiology Bureau (DOH-EB) na 4,633 ang bagong mga kaso ng human immunodeficiency virus (HIV) sa bansa mula Enero hanggang Marso 2026 kung saan nangunguna rito ang National Capital Region (NCR).
Batay sa ‘HIV & AIDS Surveillance of the Philippines’ report ng ahensya, 95% o 4,381 ay kinabibilangan ng mga lalaki samantalang 5% o 252 ang mga babae.
Sinabi pa sa report na karamihan sa mga ito ay nasa edad 25 hanggang 34 na bumubuo sa 46%, kasunod ang mga nasa edad 15 hanggang 24 na nasa 31% samantalang 18% ang nasa edad 35 hanggang 49 at yaong nasa edad 50 pataas ang bumubuo sa 3%.
Sinabi ng DOH na 51 katao ang aberids bawat araw ang nahawaan ng HIV sa unang tatlong buwan ng taon.
Ayon sa ahensya, nakakabahala na 1,104 o 24% sa mga bago lang nakumpirma na mga kaso ang nasa advanced stage na ng HIV nang sila ay ma-diagnose.
Ipinapakita ng datos na ang NCR ay nakapagtala ng pinakamataas na bagong kumpirma ng nahawaan kung saan 989 o 21% ito ng kabuuang bilang.
Sinundan ito ng CALABARZON (Cavite, Laguna, Batangas, Rizal at Quezon) o Region 4A, na may 808 kaso o 17%, Central Luzon (Region 3) na may 551 kaso o 12%, Soccsksargen (South Cotabato, Cotabato City, Sultan Kudarat, Sarangani at General Santos City o Region 12, na may 277 kaso o 6%, at Davao Region (Region 11) na may 263 kaso o 6%.
Giit ng DOH, mula 1984 kung saan unang naitala ang kaso ng HIV sa bansa, may kabuuan ng 168,079 ang kumpirmadong mga kaso o cumulative cases.
Sa nasabing mga kaso, 158,670 o 94% ang mga lalaki samantalang 9,399 o 6% ang mga naapektuhang babae.
Kasabay nito, naobserbahan ng ahensya na pabata nang pabata sa nakalipas na taon ang naitalang mga kaso ng HIV sa bansa.
Samantala sa kasalukuyan, 108,367 people living with HIV (PLHIV) ang nasa pangangalaga ng pamahalaan sa ilalim ng free antiretroviral therapy (ART) program.
