ITO ang kumakalat na mga litrato online kung saan sumusuporta umano sa sinabi ng 18 dating miyembro ng Philippine Marines sa isinagawang press conference kahapon sa Club Filipino sa San Juan City kasama si Atty. Levito “Levi” Baligod.
Si Baligod ang abogado na nakilala sa pagsampa ng kaso kay Janet Lim Napoles kaugnay sa kontrobersyal na PDAF scam na kinasangkutan ng mga pulitiko noong 2014.
Batay sa sinumpaang salysay ng mga sundalo, bilyon-bilyong pisong pera na nakalagay sa maleta ang ikinakarga sa helicopter at inihahatid sa iba’t ibang lugar.
Lumalabas sa record ng Civil Aviation Authority (CAA) na ang tinutukoy na helicopter ay isang Augusta Westland AW139 chopper, registry no. RP-C8111 na makikita sa litrato.
Sinabi pa sa ulat na ang nasabing chopper ay naka-rehistro sa Misibis Aviation & Development Corp, na pagmamay-ari mismo ng dating kongresista na si Zaldy Co at na ito rin ang ginagamit ng kumpanya para ihatid ang mga customer nito sa Misibis Bay Resort sa Albay.
Pagka-baba sa helicopter, dito na idine-deliver ng mga dating sundalo ang male-maletang pera kung saan pinatutuhanan nila ang nauna nang pahayag ng kasamahan nilang si Orly Guteza.
Ayon kay Guteza, nakapaghatid siya ng male-maletang pera sa bahay ni dating House Speaker Martin Romualdez sa South Forbes Park sa Makati City.
Matapos ang testimonya, hindi na ngayon makita si Guteza.
