TULAD ni Congressman Martin Romualdez na nahalal muli bilang House speaker ng Mababang Kapulungan ng Kongreso, muli ring nahalal bilang Pangulo ng senado si Senador Francis “Chiz” Escudero sa ginanap na botohan ngayong araw sa pagbubukas ng sesyon ng ika-20 Kongreso.
Labing siyam (19) na senador ang bumoto pabor kay Escudero samantalang sina senador Risa Hontiveros, Loren Legarda, Juan Miguel ‘Migz’ Zubiri at Panfilo ‘Ping’ Lacson lamang ang bumoto kay dating senate president Tito Sotto.
Kasama sa nagpanatili kay Escudero ang tinaguriang Duterte bloc na kinabibilangan nina Senador Bong Go, Imee Marcos, Rodante Marcoleta, Ronald “Bato” dela Rosa, Robin Padilla, at ang magkapatid na sina Mark at Camille Villar.
Sina Senador Bam Aquino at Kiko Pangilinan na kaalyado ng ruling party noon na Liberal Party ay bumoto rin kay Escudero upang manatili ito sa puwesto.
Si Senador Joel Villanueva na nag-nominate kay Escudero ang naging Majority Floor Leader samantalang si Senador Jinggoy Estrada naman ang napiling Senate Pro Tempore.
Kasama rin sa nagpanalo kay Escudero sina Senador Lito Lapid, Sherwin Gatchalian, ang kapatid sa ama ni Jinggoy na si JV Ejercito, ang magkapatid na Raffy at Erwin Tulfo ganun din sina Alan at Pia Cayetano.
Batay sa patakaran ng senado, ang natalong si Sotto ay awtomatikong magiging Senate Minority Leader.
