SA PAGPAPATULOY na pagdinig ng House Committee on Justice ngayong araw ng Miyerkules, sinabi ng isang opisyal ng Anti-Money Laundering Council (AMLC) na nai-flagged nila ang mga bank accounts ni Vice President Sarah Duterte at asawa nitong si Manases Carpio dahil sa mga kaduda-dudang mga aktibidad.
Ayon kay AMLC Executive Director Ronel Buenaventura, ang nasabing transaksyon ay mula sa taong 2006 hanggang 2025 na may kabuuang halaga na ₱6.77 bilyon.
“Opo, mayroong kaduda-dudang mga transaksyon at ang mga transakyong ito ay makikita sa aming sistema, database at record,” ang sagot ni Buenaventura sa isang clarificatory question ng isang mambabatas.
Sa isang summary report, sinabi ng AMLC na sa 131 transaksyon ng pangalawang pangulo, 17 ang kaduda-duda at sa 317 transaksyon naman ng kaniyang asawa, 16 dito ang kaduda-duda.
₱3.77 bilyon ang konektado kay Duterte at ₱2.99 bilyon naman kay Carpio kung kaya umabot sa ₱6.77 bilyon ang na-flagged na halaga.
Pahayag ni Manila Representative Joel Chua, miyembro ng nasabing komite, ang nasabing mga transaksyon aniya ay hindi nakalagay sa Statements of Assets, Liabilities, and Net Worth (SALNs) ng pangalawang pangulo.
Sinabi naman ni Bicol Saro Party-list Representative Terry Ridon na kung ikukumpara aniya ang mga transaksyon, makikitang may malaking pagkakaiba sa kaniyang financial activity at sa naiulat na mga asset.
Idinagdag pa ni Buenaventura na isa umano sa naging kaduda-duda ay ang pagdeposito sa bank account ni Duterte ng ₱500,000 sa isang araw kaya awtomatiko na ito sa bangko na kailangang iulat sa AMLC.
