NAGSIDATINGAN na ang daan-daang non-teaching personnel ng Department of Education (DepEd) para sa kanilang taunang National Congress na gaganapin mula Nobyembre 26 hanggang 28 sa Crown Legacy Hotel, Baguio City.
Ang nasabing kombensyon ay inorganisa ng DepEd-National Employees’ Union kung saan layon nitong pag-usapan ang mga pangunahing isyu na makakaapekto sa kanilang hanay.
Lakip din sa kanilang ika-17 taon na National Congress and Seminar Wokshop ang pagpapalakas sa ugnayan at kasanayan sa pagitan ng mga guro at kawani ng ahensya.
Ayon kay Atty. Domingo Alidon, presidente ng DepEd-NEU, pag-uusapan din sa kombensyon ang pagbuo ng mga polisiya, kapasyahan sa mga nagdaang mga mungkahi para sa kapakinabangan ng mga delegado para na rin sa kanilang propesyunal na pag-unlad.
“Sa loob ng tatlong araw, may serye rin kami ng mga plenary session, breakout workshop, iba’t ibang miting at konsultasyon sa lahat ng mga miyembro mula sa iba’t ibang mga rehiyon sa bansa,” ang pahayag ni Alidon.
Tinatayang dalawa hanggang tatlong libo ang mga delegado na dadalo ngayong taon kung kaya maliban sa hotel, ginamit din ang tanyag na Teachers Camp para sa dagdag na tutuluyan.
