MULA 400,000 apektadong kustomer habang nananalasa ang Bagyong #UwanPH, bumaba na sa 197,000 ang mga apektadong kustomer ng Manila Electric Company (Meralco) Lunes ng umaga.
Batay sa pinakahuling datos, humigit-kumulang 10,000 sa mga ito ang nasa mga lugar kung saan may naiulat na mga pagbaha partikular na sa ilang bahagi ng Cavite, Bulacan, Quezon, Rizal, Laguna, Batangas at Metro Manila.
Tiniyak naman ni Joe Zaldarriaga, Tagapagsalita ng Meralco, todo-kayod ang mga tauhan ng kumpanya para maibalik sa lalong madaling panahon ngunit isinasaisip ang ligtas na serbisyo ng kuryente sa apektadong mga lugar.
“Nakatutok kami sa Meralco sa lagay ng panahon lalo na at patuloy ang malakas na hangin at pag-ulan na dulot ng bagyo. Humihingi kami ng pang-unawa at pasensya mula sa aming mga customer dahil kailangan naming[g] bigyang prayoridad ang kaligtasan ng mga komunidad at ng aming mga crew sa pagbabalik ng serbisyo ng kuryente,” ang pahayag ni Zaldarriaga.
Kasabay nito, pinapaalalahanan ng Meralco ang publiko na maging mapagmatyag at maging maingat sa paggamit ng kuryente lalo na kung mayroong pagbaha:
- Patayin ang main power switch o circuit breaker. Siguraduhing tuyo ang kamay at paa bago humawak ng anumang electrical equipment.
- Tanggalin sa pagkakasaksak ang lahat ng appliances at patayin ang mga permanenting nakakabit na kagamitan. Kung maaari, alisin ang mga bombilya.
- Linisin ang putik at dumi mula sa electrical equipment gamit ang rubber gloves at rubber soled na sapatos.
- Siguraduhing tuyo ang lahat ng mga kable, outlet, at iba pang gamit bago gamitin.
- Ipasuri sa isang lisensyadong electrician ang wiring system at mga appliances bago muling gamitin. Huwag kailanman gamitin ang electrical equipment na nasira ng baha.
Ayon pa kay Zaldarriaga, maging alerto at panatilihing bukas ang linya ng komunikasyon at siguraduhing fully-charged ang mga mobile phone, laptop, radyo, at iba pang devices upang mabantayan ang balita.
“Sa panahon ng matinding pagsubok, pinapaalalahanan namin ang publiko na maging mapanuri sa impormasyon na kanilang natatanggap. Tiyaking tama ang pinagmulan nito bago ito ipakalat. Ang maling balita ay nakakadagdag lang sa pangamba, lalo na sa ganitong panahon,” dagdag pa ni Zaldarriaga.
Para sa mga alalahanin sa serbisyo ng kuryente, maaaring mag-report ang mga customer sa pamamagitan ng My Meralco app, sa opisyal na social media accounts ng Meralco sa Facebook (www.facebook.com/meralco) at X dating Twitter (@meralco). Maaari rin silang mag-text sa 0920- 9716211 o 0917-5516211, o tumawag sa Meralco Hotline 16211.
