SUPORTADO ni Mayor Leovi Morpe ng Rosario sa lalawigan ng Batangas ang panukalang batas ni Sen. Bam Aquino na tinatawag na Classroom-Building Acceleration Program Act.
Layon ng Senate Bill No. 121 na pabilisin ang pagpapatayo ng mga silid-aralan sa mga pampublikong paaralan upang mabawasan na ang backlog o kakulangan ng mga classroom sa buong bansa.
Ayon kay Aquino, iba-bypass na ng panukalang batas na ito ang Department of Public Works and Highways (DPWH) pagdating sa pondo, sa halip ang pera ay idi-deretso na sa mga local government unit (LGU).
Ngunit idinagdag pa ng senador na para maiwasan ang anumang anomalya, magiging katuwang ng LGU ang mga non-governmental unit (NGO) na may tract record na sa paggawa ng mga school building.
Kaya naman, sumang-ayon agad sa Senate Bill na ito si Mayor Leovi Morpe ng bayan ng Rosario na umaasang mapapabilis ang pagpapatayo ng mga classroom at sa mas murang halaga na magiging malaking tulong aniya sa kanilang educational program.
Ayon kay Morpe na nakilala sa kaniyang programang “Serbis Pa More,” magiging katuwang niya si Vice Mayor Atanacio “Tani” Zara para isulong ang programang pang-edukasyon sa kanilang bayan para sa kapakanan ng kanilang mga kabataan.
Si Morpe, na kilala rin sa kaniyang slogan na “Magpursige upang bayan ay umige,” ay nagsabi na mas pinapalakas pa nila ang scholarship program lalo na sa mga kabataang nagnanais mag-kolehiyo upang mai-angat pa ang antas ng edukasyon sa bayan ng Rosario.
“Handa tayong mag-alalay sa mga estudyante na gustong mabago ang kanilang buhay, makatapos sa pag-aaral, makapaghanap ng magandang trabaho at maka-ahon sa hirap ng buhay,” ang sabi ng alkalde.
Bago maging negosyante at nang maglaon ay maging lingkod bayan, alam ng mga tag-Rosario ang talambuhay ng alcalde kung saan bilang anak ng magsasaka ay nagpursige ito sa pag-aaral hanggang sa makapagtapos.
“Pangarap din natin na dahil sa Classroom-Building Acceleration Program Act ni Senator Bam, darating ang panahon na magiging isang realidad na ang pagkakaroon ng karagdagang mga eskuwelahan at kolehiyo bayan ng Rosario para sa susunod na maging lider ng ating bayan. (MAR OLETE)
