MAY kabuuang bilang na 561 na mga tauhan ng Eastern Police District (EPD) ang ipapakalat sa mga sementeryo sa nasasakupan nitong mga lungsod ng Pasig, Mandaluyong, Marikina at San Juan o mas kilala sa tawag na PaMaMariSan para tiyakin ang kaayusan at seguridad sa Undas 2025.
Ayon kay EPD Director PBGen. Aden Lagradante, magdadagdag pa sila ng 270 tauhan na magsisilbing ‘anti-criminality team’ sa matataong mga lugar tulad ng mga transport terminal, malls at malalaking lansangan.
Maliban dito, may karagdagan pang 104 personnel ang bubuo bilang ‘reactionary standby support force’ na nakabase sa EPD Headquarters at nakahanda anumang oras para sa deployment sakaling kailangan pa sa isang emergency situation.
Mula Nobyembre 1 hanggang 2, sisiguraduhin ng pamunuan ng EPD ang maximum police visibility, seguridad, kaayusan lalo na ang police assistance upang maging maayos at mapayapa ang pag-alaala ng Sangkakristiyanuhan ng All Saints’ Day at All Souls’ Day.
Karagdagan pa, aabot sa 681 na mga boluntaryong sibilyan o force multiplier ang tutulong sa mga kapulisan para sa pagsasaayos ng daloy ng trapiko, public assistance at crowd control sa anim na pampubliko at walong pribadong sementeryo na nasasakupan ng EPD.
Maglalagay din ng mga police assistance desk sa lahat ng sementeryo at iba pang matataong lugar para maasikaso kaagad ang anumang pangangailangan ng mga tao lalo na pagdating sa emergency.
Idinagdag pa ni Lagradante na ipapatupad din nila ang round-the-clock na pagpapatrolya sa mga vital installations, na panmgungunahan ng foot patrol personnel upang maging babala sa sinumang nagbabalak gumawa ng krimen.
Upang matiyak naman ang disiplina at naipapatupad ang mga paghahandang ito, magsasagawa ng hindi pinapaalam o biglaang inspeksyon ang pamunuan ng EPD upang malaman na laging handa ang mga tauhan ng EPD sa anumang mangyayaring emergency.
