NAREKOBER ng mga tauhan ng Marikina City Police Station ang isang barbeque stick na ginamit ng suspek sa pangho-holdup sa isang babae sa harap ng isang gasolinahan sa Brgy. Concepcion Uno ng nasabing lungsod nitong Agosto 3, bandang alas-5 ng umaga.
Kinilala ni PBGen. Aden Lagradante, district director ng Eastern Police District, ang suspek na si alyas “Raymon,” 37, at residente ng Brgy. San Isidro, Cainta, Rizal.
Ayon sa inisyal na imbestigasyon, habang nagsasagawa ng Anti-Criminality Law Enforcement Operation (SACLEO) ang mga operatiba, may natanggap sila ng tawag mula sa 911 Hotline kaugnay sa insidente ng pangho-holdup sa nabanggit na lugar.
Agad na rumesponde ang mga pulis at nang dumating sila sa gasolinahan, sinalubong sila ng babaeng biktima at inginuso ang noo’y tumatakas na suspek.
Nagkaroon ng habulan at nang ma-korner ang suspek agad na inaresto ito at narekober mula sa kaniya ang mga ninakaw na gamit at isang barbecue stick na ginamit umano ng suspek sa pananakot ng biktima, na nagdulot ng galos sa leeg nito.
Ang suspek ay pansamantalang ikinulong sa Custodial Facility ng Marikina City Police Station habang inihahanda ang mga kaukulang dokumento para sa isasagawang inquest proceedings kung saan siya ay nahaharap sa kasong robbery with violence and intimidation.
