ARESTADO ang dalawang lalaki matapos mahuling nagsusugal ng cara y cruz sa kalsada na kung saan nang kapkapan ay nakuhanan naman ng aabot sa 15.3 gramo ng shabu na nagkakahalaga ng ₱105,570.00, kahapon ng madaling araw sa Taytay
Ayon sa report, nagpapatrolya ang tauhan ng Taytay Municipal Police Station bandang 4:00 Miyerkules ng madaling araw nang maaktuhang nagsusugal ng cara y cruz ang mga suspek na nakilalang lamang sa alyas “Juswa at Angelo”, kapwa nasa hustong gulang at parehong residente ng Taytay, Rizal.
Sinita ang dalawa sa pagsusugal habang nag-alisan naman ang ilang miron sa kalsada at nang kapkapan ay tumambad ang dalawang plastic sachet na naglalaman ng shabu na may timbang na humigit kumulang 15 gramo at may standard drug price na aabot sa ₱105,570.00.
Nabatid na rumaraket ang dalawa para magbenta ng illegal na droga.
Kasalukuyang nakakulong sa Taytay Custodial Facility ang mga suspek at kinasuhan ng kasong paglabag sa PD 1602 o illegal gambling at section 11, Article II of RA 9165 o Dangerous Drugs Act of 2002.
