Arestado ang dalawang teenager na holdaper nang pumalag ang 19-anyos na dalagang factory worker na kanilang biniktima sa Malabon City, kahapon ng madaling araw.
Kung hindi kaagad dumating sina Pat. Roldan Rodriguez at Pat. Christian Mark Dumalag ng Malabon Police Sub-Station-5, malamang nalamog sana sa bugbog sa mga humabol na kalalakihan ang dalawang suspek na sina alyas “Shawn” 18-anyos, residente ng Melon Road, Brgy. Potrero at 17-anyos niyang kasabwat na residente naman ng Sabalo St. Caloocan City.
Sa ulat ni P/SSg Diego Ngippol kay Malabon police chief P/Col. Jay Baybayan, naglalakad ang biktimang si Wency Rose Vinzon ng Paradise Village, Brgy. Tonsuya, bandang 4:00 ng madaling araw sa tapat ng Malabon Citisquare Mall sa C-4 Road, Brgy. Longos, nang kalabitin ni alyas Shawn at tutukan ng patalim sa likod ang biktima sabay deklara ng holdap.
Pilit inagaw ng suspek ang cellphone ni Vinzon, subalit pumalag at nagsisigaw ang biktima na nakatawag pansin sa mga nasa kalsada.
Dahil dito, napilitan ang dalawang suspek na tumakbong patakas subalit hinabol sila ng mga kalalakihan hanggang sa nakorner at kukuyugin na sana nang dumating ang mga pulis.
Nakuha sa mga nadakip ang dalawang balisong na gamit nila sa panghoholdap habang positibo silang itinuro ng biktima na hindi binitiwan ang inaagaw sa kanyang P5,000 halaga ng cellular phone.
