Inaresto ng Talipapa Police Station (PS-3) ang isang 20-anyos na binata sa pagdadala ng baril habang naglalakad sa kahabaan ng Camachile, Quezon City
Kinilala ni PS 3 head PLtCol. Morgan Aguila ang suspek na si John Rey Obrero, residente ng Camachile, Brgy. Unang Sigaw, Quezon City sa kasong illegal possession of firearms.
Ayon sa report, inaresto ng mga tauhan ng PS 3 ang suspek habang nagsasagawa ng anti-criminality bandang 12:30 Huwebes ng madaling araw sa Camachile, Brgy. Unang Sigaw, Quezon City at nakita ang naglalakad na suspek na may kahina-hinalang kilos.
Sinita nila ang suspek at nakita ang dalang revolver pistol na may tatlong bala at nang hanapan ng permit ay walang maipakita ang binata kaya agad na dinampot at dinala sa presinto.
Kasalukuyang nakakulong ang suspek at sinampahan ng paglabag sa R.A. 10591 o Comprehensive Firearms and Ammunition Regulation Act sa tanggapan ng Quezon City Prosecutor’s office.
