PINAGHAHANAP pa rin hanggang ngayon ng mga awtoridad ang isa sa 2 bata na pinaniniwalaang nalunod din matapos tangayin ang mga ito ng agos ng ilog sa Brgy. Bombongan, Morong, Rizal nitong Hulyo 20, 2025.
Kinilala ang mga nawawalang bata na sina Gene Heinrich Dacumos, 12 anyos, at Ruben Cioseph Giray Cubilla, 10 anyos, na parehong mga residente ng Mabuhay Homes, Darangan, Binangonan, Rizal.
Batay sa inisyal na imbestigasyon, naliligo umano sa ilog sina Ruben Cioseph at magkapatid na Dacumos na sina Gene Heinrich at John Henry nang biglang tangayin ang dalawang biktima ng rumaragasang tubig sa kasagsagan ng masamang panahon.
Nangyari umano ang insidente noon pang Hulyo 19 bandang alas-12 ng tanghali ngunit dahil sa takot, Hulyo 20 na nang sabihin ng 10 taong gulang na si John Henry sa ina nito ang nasabing pangyayari.
Kaagad na iniulat ng ina ng mga biktima ang insidente sa Morong Municipal Police Station na agad namang nakipag-ugnayan sa Municipal Disaster Risk Reduction and Management Office (MDRRMO).
Kasama ang mga tauhan ng Barangay Police Security Office (BPSO) at iba pang volunteer responders, isinagawa ang search and retrieval operations para mahanap ang dalawang biktima.
Sa pinakahuling ulat, positibong kinilala ng ina ng biktima si Gene Heinrich Dacumos, 12 anyos na natagpuang wala ng buhay sa ilog ng Tanay umaga ng Lunes, Hulyo 21, 2025.
Pinaghahanap pa rin ang isa pang biktima na si Ruben Cioseph Giray Cubilla habang isinasagawa ang patuloy na imbestigasyon para alamin ang buong detalye sa nasabing insidente.