NANININDIGAN ang Armed Forces of the Philippines (AFP) sa kanilang naunang pahayag na ang napaslang na estudyante ng University of the Philippines (UP) sa isang engkuwentro sa Negros Occidental ay hindi sibilyan dahil sa armado ito at may suot pang combat gear.
Ayon kay AFP chief of Staff General Romeo Brawner Jr., ang nangyari noong Abril 19 sa bayan ng Toboso ay sa pagitan ng Philippine Army (PA) at New People’s Army (NPA) kung saan 19 ang patay sa panig ng mga rebelde kabilang na si Alyssa Alano.
“Sinasabi ba nilang inosenteng estudyante si Alano? Hindi. Kung inosente siya at walang balak sumali sa armadong grupo, bakit nung matagpuan siya ay may suot itong combat rig at may magazine pouch pa. Armado siya. Nakipagbakbakan siya,” ang pahayag ni Brawner.
Idinagdag pa ni Brawner na espisipikong nangyari ang bakbakan sa Brgy. Salamanca, Toboso, Negross Occidental sa pagitan ng 79th Infantry Batallion at mga natitirang miyembro ng Northern Negros Front, Komiteng Rehiyon-Negros (NNF, KR-N).
Matapos aniya umatras ang mga rebelde, narekober ang mga nasawi at matataas na kalibre ng baril at subersibong mga dokumento lakip na ang hindi bababa sa lima pang pinaghihinalaang rebelde na nahuli sa follow-up operation.
Subalit kinontra ito ng ilang human rights advocates at sinabing si Alano ay biktima ng “state-sponsored” na pagpatay.
Nag-candle light vigil ang mga estudyante at alumni sa UP Diliman upang magbigay-pugay kay Alano at kondenahin ang nasabing insidente, at kasali sa mga dumalo at nagsalita ay ang aktres na si Tuesday Vargas.
“Napakabigat ng aking puso pero ako ay nagtungo sa aking paaralan upang maki-isa. Mataas na pagpugay kay Alyssa. Salamat sa iyong paninilbihan sa lahat ng mga sektor partikular na ang mga magsasaka sa kanayunan,” ang sigaw ni Vargas.
