Umabot sa 66 na aplikante ang mabilis na nakakuha ng trabaho matapos silang ma-hired on the spot sa ginanap na Marikina City Day Job Fair nitong Huwebes, Abril 16.
Ang naturang aktibidad, na inorganisa ng Marikina City Labor Relations and Public Employment Service Office (LRPESO) katuwang ang Department of Labor and Employment (DOLE), ay isa sa mga pangunahing tampok sa pagdiriwang ng ika-396 na anibersaryo ng pagkakatatag ng lungsod.
Ayon kay Mayor Maan Teodoro, mahalaga ang pagsasagawa ng mga ganitong job fair upang mabigyan ng matatag na kabuhayan ang mga residente, lalo na’t nararamdaman ang epekto ng krisis sa gasolina at ekonomiya.
“Ngayong panahon ng krisis, gusto nating tulungan ang ating mga kapwa taga-Marikina na makahanap ng trabaho. Maganda rin itong chance for job seekers to connect with people and businesses,” pahayag ng alkalde.
Sa kabuuang 1,227 na aplikanteng nagparehistro, isang 20-anyos na residente ang naitalang unang hired on the spot bilang supermarket clerk.
Halos 50 kumpanya mula sa sektor ng pagkain, retail, at manufacturing ang nagbukas ng pinto para sa mga bagong empleyado, bukod pa sa limang overseas employment agencies para sa mga nagnanais mangibang-bansa.
Kasabay ng paghahanap ng trabaho, naging katuwang din ang mga ahensya ng gobyerno tulad ng SSS, BIR, PAG-IBIG, Philhealth, DMW, at OWWA na naghatid ng kaukulang serbisyo sa mga dumalo.
Binigyang-diin ng alkalde na hindi magsasawa ang pamahalaang lungsod sa pagpapalawak ng mga ganitong oportunidad sa hinaharap para sa kapakanan ng mga taga-Marikina.
Bukod sa job fair, naging abala ang lungsod sa serye ng mga aktibidad gaya ng cultural storytelling na “Salamyaan,” ang pagbubukas ng Women Entrepreneurs Fair at Angkan Banchetto, at ang inagurasyon ng Marikina Heritage Building na magsisilbing imbakan ng kasaysayan at sining ng lungsod.
Hindi rin naiwan ang mga “furparents” dahil naghandog ang City Veterinary Office ng libreng bakuna at grooming para sa mga alagang hayop, habang ang Bikeways Office naman ay naglunsad ng libreng bicycle lessons bilang bahagi ng active mobility initiative ng lungsod.
Alinsunod sa Republic Act No. 12103, ang Abril 16 ay isang special non-working holiday sa lungsod bilang pagkilala sa Marikina Day.
Ang mga aktibidad na ito ay ang ating paraan para magbalik-tanaw sa ating kasaysayan… at tuloy-tuloy magbigay ng serbisyo sa lahat. Ito ang aming pasasalamat at pagmamahal sa Marikina,” pagtatapos ni Mayor Maan. (AJ PAJARON)
