TINANGGAP na ng mga opisyales ng Muntinlupa City ang Mobile Command and Control Vehicle with Triage Technology (MoCCoV) mula sa Department of Science and Technology-National Capital Region (DOST-NCR) sa isang seremonya, Abril 17, 2026.
Ang MoCCoV ay isang high-tech na sasakyan na magsisilbing mobile command center sa panahon ng sakuna kung saan makakatugon agad ito sa kalamidad at malaking tulong sa lokal na mga opisyal at emergency responders na gumawa ng mas mabilis at batay-sa-agham na desisyon
Ang MoCCoV ay may kumpletong kagamitan tulad ng weather monitoring system, drone para sa rescue operations, satellite communication, at iba’t ibang medical at rescue tools. Mayroon din itong portable na bangka at conference area kung saan maaaring magplano ang mga responder habang nasa aktwal na operasyon. Gumagamit din ito ng solar at wind energy upang matiyak na tuloy-tuloy ang operasyon kahit mawalan ng kuryente.
Bukod dito, kayang pagsamahin ng MoCCoV ang real-time data upang mapabilis ang koordinasyon, tamang paglalaan ng resources, at mas episyenteng pagtugon sa mga apektadong komunidad. Ang teknolohiyang ito ay binuo ng Pilipinong imbentor na si Dennis Abella at ipinapamahagi sa mga lokal na pamahalaan sa ilalim ng CEST Program ng DOST.
Kasabay nito, binuksan din ng DOST-NCR ang kauna-unahang Innovation Hub (iHub) sa loob ng Colegio de Muntinlupa upang itulak ang technopreneurship at mga makabagong solusyon sa komunidad, partikular sa mga lugar ng MUNTAPARLAS (Muntinlupa, Taguig, Pateros, Parañaque, at Las Piñas).
Ang iHub ay isang bukas at collaborative na workspace para sa mga estudyante, researcher, startup, at lokal na innovator. Dito, maaari silang tumanggap ng mentoring, gumamit ng advanced equipment, at paunlarin ang kanilang mga ideya hanggang maging handa sa merkado.
Matatagpuan din sa iHub ang Project SARAI Centro Hub, na nakatuon sa paggamit ng makabagong teknolohiya sa agrikultura upang matulungan ang mga magsasaka na makaangkop sa climate change, mapataas ang ani, at mapalakas ang kanilang kabuhayan.
Ayon sa DOST-NCR, ang mga proyektong ito ay bahagi ng mas malawak na layunin na gawing smart city ang Muntinlupa—kung saan pinagsasama ang agham, teknolohiya, at komunidad para sa mas ligtas, mas matatag, at mas maunlad na lungsod. (RAFFY RICO)
