Kinilala ng Department of Foreign Affairs (DFA) ang mga kamakailang pahayag mula sa iba’t ibang sektor hinggil sa panukalang muling pagbubukas ng talakayan sa pagitan ng Pilipinas at China ukol sa kooperasyon sa langis at natural gas.
Sa opisyal na pahayag, binigyang-diin ng DFA na taglay ng Pilipinas ang ganap na karapatan sa mga likas na yaman na matatagpuan sa loob ng Exclusive Economic Zone (EEZ) at continental shelf nito, kabilang ang mga deposito ng langis at gas. Ang paggamit sa karapatang ito ay alinsunod sa soberanya ng bansa at sa layuning matiyak ang seguridad sa enerhiya.
Ayon sa kagawaran, binigyang-diin ni Ferdinand R. Marcos Jr. ang pangangailangang tuklasin ang lahat ng legal at kapaki-pakinabang na opsyon upang matiyak ang matatag, sapat, at abot-kayang suplay ng enerhiya para sa ekonomiya at sa mamamayang Pilipino, lalo na sa gitna ng pandaigdigang kawalang-katiyakan sa sektor ng enerhiya at sa deklarasyon ng National Energy Emergency.
Iginiit ng DFA na anumang kasunduan sa oil at gas—sa China o sa alinmang dayuhang bansa—ay dapat na naaayon sa Konstitusyon ng Pilipinas, umiiral na mga batas, jurisprudence, at regulasyon, habang ganap na pinangangalagaan ang soberanya ng bansa.
Dagdag pa ng DFA, patuloy itong makikipagtulungan sa iba pang ahensya ng pamahalaan upang matiyak na ang anumang kasunduan ay nakabatay sa pambansang interes.
Isusulong din nito ang diplomasya, pagsunod sa internasyonal na batas, at mapayapang resolusyon ng mga alitan, habang pinangangalagaan ang karapatan ng Pilipinas sa mga yamang-dagat at teritoryo nito. (IZA ALDANA)
