SUGATAN ang isang lasing na lalaki nang barilin ng rumesponding pulis matapos itong mag-amok sa Grava Falls, Carolina Village, Sitio Leyva 2, Brgy. Sta. Cruz, Antipolo City, bandang alas-10:30 ng umaga, Hulyo 30, 2025.
Batay sa report ng Antipolo City Component Police Station, nakatanggap umano ng impormasyon ang Public Safety Office ng naturang barangay na may nag-aamok kaya rumesponde agad sa lugar ang mga tanod kasama sina Patrolman Evan Borela at Patrolman Morris Morante.
Pagkadating sa lugar, nagwawala umano ang lasing na lalaki at armado ng improvised firearm o sumpak na kinilala ng pulisya na si alyas “Arle,” residente ng nabanggit na lugar na ayon sa mga kabarangay ay kilala itong notoryos at sangkot sa mga nakawan.
Nagpakilalang mga alagad ng batas ang mga rumesponding operatiba at sinubukan pang pakalmahin ang suspek ngunit nagtangka pa umano itong makipagbarilan.
Idinagdag pa sa ulat na nang akma na umanong babaril ang suspek ay inunahan na ito ni Patrolman Borela at tinamaan sa ibabang bahagi ng katawan ang suspek.
Nang ito ay bumagsak, agad na dinis-armahan ang lalaki at isinugod sa Rizal Provincial Hospital System- Annex 1 para lapatan ng lunas. Narekober sa suspek ang sumpak, isang live bullet ng kalibre .38 na baril.
Patuloy pa ang isinasagawang imbestigasyon sa nasabing insidente at inihahanda na ng pulisya ang mga kasong Alarm & Scandal, Attempted Homicide, at paglabag sa Republic Act 10591 o Comprehensive Firearms and Ammunition Regulation Act.
