Rapist ng 2 bata sa Marikina arestado sa Sorsogon

ARESTADO ang isang rapist nang magtago sa probinsya matapos halayin noong nakaraang taon ang 2 batang menor-de-edad sa Marikina City na kapitbahay at kalaro ng kaniyang anak.

Kinilala ni PCol. Villamor Tuliao, district director ng Eastern Police District (EPD) ang suspek na si alyas “Buboy,” 39-anyos at tinaguriang ika-7 sa most wanted person ng National Capital Region Police Office (NCRPO).

Batay sa imbestigasyon, palagiang pumupunta sa bahay ng suspek ang dalawang batang biktima upang makipaglaro sa anak nito.

Sinabi pa ni Tuliao na nakakahanap ng pagkakataon ang suspek upang molestiyahin ang isang 8-taong gulang na batang babae at ginahasa naman ang pinsan nito na 7-taong gulang lamang.

Matapos mabuking ang kahayupang ginawa nito sa mga kalaro ng kaniyang anak, agad na nagtago ito sa bayan ng Prieto Diaz sa lalawigan ng Sorsogon kung kaya’t naglabas ng warrant of arrest ang husgado.

Sa bisa ng warrant of arrest na inisyu ng Acting Presiding Judge ng RTC Branch 192 ng Marikina City, inihain at inaresto ang suspek ng pinagsamang puwersa ng Warrant and Subpoena Unit, 1st Provincial Mobile Force Company ng Sorsogon Provincial Police Office, Prieto Diaz Municipal Police Station at Marikina PNP.

“Nakakadurog ng puso ang nangyari sa mga inosenteng bata. Paglalaro at kasiyahan lang sana ang nasa kanilang isipan ngunit sa murang edad ay naranasan na nila ang karahasan ng isang mapagsamantala sa kanilang kahinaan,” ang pahayag ni Tuliao.

Ang suspek na may kasong rape, 2 counts of child abuse at 3 counts of acts of lasciviousness na inilabas noong Nobyembre 2024 ay kasalukuyang nakapiit sa Prieto Diaz Municipal Police Station at inihahanda na para ilipat sa Marikina City Police Station.

About Author

Show comments