SA KABILA diumano nang humihinang pwersa ng mga Duterte, pinalutang kahapon ni dating
Presidential Spokesperson Harry Roque ang posibilidad na Sara Duterte–Imee Marcos tandem
sa 2028 elections, sa isang interview sa TV5.
Matatandaang tinanggal kamakailan sa Kamara ang mga kaalyado ng mga Duterte, sina dating
Pangulo at deputy speaker Gloria Macapagal-Arroyo (2 nd District Pampanga) at si dating deputy
speaker Isidro Ungab (3 rd District, Davao City). Dating senior deputy speaker si Arroyo bago
siya ibinaba sa pagiging deputy speaker.
Ang pagtanggal ay bunsod ng Resolution No. 1444 na nagpapahayag ng suporta sa liderato ni
Speaker Ferdinand Martin Romualdez. Hindi ito nilagdaan nina Arroyo at Ungab. Paliwanag ni
Arroyo, nasa ibang bansa siya nang ipinasa ang naturang resolusyon kaya hindi siya
nakapirma. Sinabi ni Arroyo na patuloy siyang sumusuporta sa liderato ni Romualdez, kahit
noon pang mapili ito bilang speaker.
Matatandaang sinabi ni dating Pangulong Rodrigo Duterte na ang Kamara diumano ang
pinakabulok na institusyon sa gobyerno. Dahil dito, maraming kongresista ang kumalas sa
partidong PDP-Laban.
Ayon sa political analyst na si Ronald Llamas, “Hindi nga natin kinakailangang mag-read
between the lines eh, dahil itong mga pangyayaring ito, hindi naman ito nangyari kahapon.
Nangyari ito last year pa eh, di ba, nung hindi naging Speaker si former President Arroyo, nung
tinawag diumano ni Vice-President Duterte si Romualdez na “tambaloslos”. Ayon sa
www.tagalogwords.com, “Ang tambaloslos ay isang halimaw na may malaking bibig at lawlaw
na ari.”
Sinabi pa ni Llamas na diumano, ang pagtanggal ng confidential funds ng Office of the Vice
President na ginawa ng both Houses “with finality” ay may basbas daw ni Pangulong Ferdinand
Marcos, Jr.
Nilinaw kamakailan ni Imee Marcos sa isang vlog na hindi niya iiwan ang mga Duterte, kahit na
raw siya na lang ang matitirang supporter ng mga ito. Wala namang reaksyon ang kanyang
pinsan na si Speaker Romualdez.
Sinabi ni VP Sara na malayo pa ang 2028 Presidential elections, kaya hindi muna dapat mag-
speculate.
Kung sakaling matuloy ang tambalang Sara-Imee sa 2028, sino kaya ang magiging manok ni
Pangulong Bongbong, ang kanyang kapatid o ang kanyang pinsan?
