Todas ang isang menor-de-edad na lalaki habang sugatan naman ang isang pintor na nagtangkang umawat matapos pagsasaksakin ng dalawang menor-de-edad na lalaki sa Navotas City, kamakalawa ng gabi.
Hindi na umabot pa ng buhay sa Navotas City Hospital sanhi ng tinamong mga saksak sa katawan ang menor-de-edad na biktima habang ginagamot naman sa Tondo Medical Center (TMC) si Ramon Doinog IV, 23-anyos, residente ng ERC St., B. Cruz, Brgy. Tangos, Navotas City.
Nagtamo si Doinog ng saksak sa likod.
Sa ulat ni police investigator PCpl Florencio Nalus kay Navotas police chief P/Col. Mario Cortes, naganap ang insidente bandang 7:00 ng gabi sa kahabaan ng A. Cruz St., corner B. Cruz St., Brgy. Tangos North, Navotas City.
Batay sa inisyal na imbestigasyon, habang naglalakad si Doinog sa nasabing lugar ay nakita nito ang menor de edad na pinagsasaksak ng isa mga suspek kaya tinangka nitong umawat.
Gayunman, sinaksak din si Doinog sa likod ng isa pang suspek bago mabilis na nagsitakas patungong B. Caseñas St.
Isinugod naman ang mga biktima sa NCH hospital, subalit idineklarang dead-on-arrival ang binatilyo habang inilipat naman sa TMC si Doinog.
Samantala, agad n inatasan ni P/Lt. Alexander Calabucal, Commander ng Navotas Police Sub-Station 2 ang kanyang mga tauhan na magsagawa ng hot pursuit operation na nagresulta sa pagkakadakip sa dalawang menor-de-edad na mga suspek at narekober sa kitchen knife na ginamit sa pananaksak.
