IKINASA ng lokal na pamahalaang lungsod ng Marikina ka-partner ang bayan ng Sakai ng bansang Japan at Onodera User Run, ang anim-na-buwang pagsasanay sa wikang Nihonggo para sa mga estudyante gayundin sa mga bagong nagsipagtapos.
Ayon kay Mayor Marjorie Ann “Maan” Teodoro, dahil ito ay libre, layon ng proyektong ito na makapagtrabaho kaagad sa Japan ang mga nagsipagtapos sa nasabing programa na magsisimula sa Hulyo 14, 2025, sa Pamantasan ng Lungsod ng Marikina (PLMar).
“Ang mga ganitong libreng language training program ay nagbubukas ng mas malalaki at mas magagandang oportunidad [na makapagtrabaho agad] ang ating mga estudyante at fresh grads [sa lungsod],” ang pahayag ni Mayor Maan.
Idinagdad pa ni Teodoro na bukas na ang Onodera User Run facility sa Marikina para sa mga interesadong estudyante na may oportunidad na makapagtrabaho sa industriya ng caregiving, hotel accommodation, at food service na mataas ang demand sa Japan.
“Malaking hadlang para sa mga Pilipinong nais magtrabaho sa Japan ang hindi marunong sa wikang Nihonggo kaya sa pamamagitan ng programang ito ay maaalis na ang balakid na iyon,” dagdag pa ng dating mambabatas.
Dagdag pa ni Teodoro, “Simbolo ito ng patuloy nating pakikipag-partner sa Sakai Town at Japan kung saan ipinapakita lang nito kung paanong ang kooperasyon ng mga tao sa dalawang bansa ay nagreresulta ng tunay na benepisyo sa mga nasasakupan.”
Sinabi pa ng Mayor Maan na malaki rin ang maitutulong ng Onodera User Run, isang mapagkakatiwalaan ng kompanya pagdating sa pagbibigay ng suporta hindi lamang sa training program kundi pa ti na rin sa job placement hanggang sa assistance kung paano mamuhay sa Japan.
Kasama rin sa nasabing paglulunsad sina Sakai Mayor Masahiro Hashimoto, PLMar President Dr. Franklin E. Ayuson, Mr. Naobumi Yokota ng Embassy of Japan, Onodera User Run President Mr. Jun Kato, at mga opisyal mula sa Institute of Global Business Strategies at JETRO Manila.