NANANAWAGAN ang Mutya ng Pasig Movement na dapat pang paigtingin ang kampanya laban sa bullying at magkaroon ng makataong pagtingin sa kalagayan ng mga biktima.
Ayon kay Ryan Tanaman, pangulo ng Mutya ng Pasig Movement, nakikiisa sila sa malungkot na nararanasan ng mga biktima ng bullying at ng kanilang mga pamilya.
Ito’y matapos ibasura ng Manila Prosecutor’s Office ang reklamo ng mag-asawang artista at Quezon City Councilor Alfred Vargas at misis nitong si Yasmine Espiritu kaugnay sa kasong bullying sa kanilang anak.
Matatandaan na nagsampa ng reklamo ang mag-asawang Vargas nitong Abril 13, 2026, laban sa artistang si Rob Sy at asawa nito, kaugnay sa pambu-bully umano ng anak ni Sy sa anak ni Vargas habang nasa swimming lesson ang mga ito.
Binigyang-diin pa ni Tanaman na bagama’t kailangang sundin at igalang ang batas, mahalaga aniyang isaalang-alang kung paano ito ipinatutupad.
Dapat din aniyang tiyakin ng mga ahensyang nagpapatupad ng anti-bullying program na mahalaga ang hustisya, proteksyon at malasakit sa mga apektadong indibiduwal at pamilya.
Giit pa ni Tanaman, malaki rin aniya ang papel ng komunidad, mga lider ng edukasyon sa pagpapalakas ng mga programa kontra pambu-bully upang matiyak na may maayos at ligtas na kapaligiran ang mga kabataan.
Ang Mutya ng Pasig Movement ay isang advocacy group na nangunguna sa kampanya laban sa bullying sa bansa at nagsusulong sa karapatan ng mga bata.