INANUNSYO ng National Bureau of Investigation (NBI) na makakaranas ng aberya ang sinumang gagamit ng kanilang online services dahil sa isinasagawang system transition.
Ngunit tiniyak ng ahensya na pansamantala lamang ito dahil nagkaroon ng problema sa gitna ng paglipat sa bagong internet service provider, ayon sa kanilang Technology and Infrastructure Division.
Naapektuhan ngayong araw ang kanilang official website na nbi.gov.ph kabilang ang Online Clearance Application Portal at maging ang internal at external email systems.
Paliwanag ng NBI, naputol umano ang koneksyon mula sa dating provider bago pa tuluyang ma-activate ang bagong sistema dahilan ng pansamantalang pagkawala ng online services.
Sa ngayon, patuloy ang ginagawang troubleshooting at restoration ng NBI technical team katuwang ang Department of Information and Communications Technology (DICT) para maibalik agad ang normal na operasyon at maiwasan ang kaparehong aberya sa hinaharap.
Sinabi ni NBI Director Atty. Melvin D. Matibag na walang naganap na security breach at pawang technical na isyu lamang ang dahilan ng downtime.
Pang-unawa naman ang hiling ng NBI sa publiko habang inaayos ang kanilang digital systems.
Kaagad na magbibigay ang ahensya ng karagdagang update sa oras na fully restored na ang kanilang online services.
Pinapayuhan ang publiko na dumulog sa pinakamalapit na tanggapan ng NBI para sa mga transaksyon na agarang kailangan. (AR Bernardo)