NANANAWAGAN si Manila Mayor Francisco “Isko Moreno” Domagoso na ilipat na sa mga lokal na pamahalaan ang pagpapatakbo at pagmamantini ng mga flood control system na nasa kanilang area of responsibility.
Reaksyon ito ng alkalde kaugnay sa kapalpakan di-umano ng pamahalaang nasyunal sa pamamagitan ng Department of Public Works and Highways (DPWH) sa pagkontrol ng baha na naranasan sa Greater Manila Area (GMA) nitong nakaraang linggo nang manalasa ang tatlong sunod-sunod na bagyo maliban pa sa habagat.
“Kung ibibigay sa mga alkalde ang awtoridad [na ito, alinman sa] aaksyon siya o mananagot [sakaling pumalpak] sa mga nasasakupan niya,” ang diwa ng pahayag ni Domagoso.
“Ipaubaya na ninyo ito sa amin—dahil kami ang araw-araw na humaharap sa tao. At kapag pumalpak kami, walang ibang sisisihin [ang aming mga nasasakupan] kundi kami,” dagdag pa ng punong lungsod.
Isa sa ikinadidismaya ni Mayor Isko ay ang Sunog Apog pumping station sa Tondo na pinangangasiwaan ng DPWH kung saan hindi gumagana ang flood control system nito.
“Brand new ito pero hindi magamit. Bagung-bago pero hindi gumagana kaya hindi epektibo,” saad pa ng alkalde dahil sa mali ang pagkagawa kung kaya walang kapasidad na kontrolin ang tubig-baha.
“Kami ang accountable sa aming mga nasasakupan. Kung ipapaubaya nyo sa amin ang pagpapatakbo at pumalpak kami, kami ang tuwirang masisisi. Sa tatlong taon [naming termino], at pumalpak kami, tapos rin kami,” giit pa ng alkalde.