NAGLABAS ng opisyal na pahayag ang Department of Education (DepEd) kaugnay sa panibagong napaulat na insidente ng pananaksak sa Cabaluay National High School sa Zamboang City.
Ayon kay DepEd Secretary Sonny Angara, pina-prioridad nila ngayon ang kapakanan, agarang tulong at paggaling ng dalawang nasugatang estudyante.
“Nakikipag-ugnayan ngayon ang DepEd Central Office sa ating Regional Office at Schools Division Office upang matiyak na mabigyan ng agarang tulong ang mga biktima at pamilya,” ang pahayag ni Angara.
“Habang patuloy na isinasagawa ang imbestigasyon, sisiguraduhin natin na mailan ang kinakilangang proteksyon para sa mga bata, guidance services at psychological support sa mga mag-aaral at school personnel habang sinusunod ang tamang proseso,” dagdag pa ng Kalihim.
Inatasan din ng DepEd ang lahat ng eskuwelahan at mga field offices sa buong bansa na paigtingin ang pagpapatupad ng kaligtasan at proteksyon ng mga bata.
Sinabi pa ng Kagawaran na patibayin pa ang pakikipag-ugnayan sa mga magulang, lokal na pamahalaan at mga otoridad para mapangalagaan ang mga estudynte.
Idinagdag pa ni Angara na nananatiling nakatuon ang ahensya sa kaligtasan ng mga estudyante upang magkapag-aral sila sa isang supportive at violence-free environment.