SAMPUNG sasakyan ang nagkarambola sa nangyaring road crash incident sa kahabaan ng Mayon Avenue, Brgy. San Jose, sa bayan ng Rodriguez, alas-8 ng gabi nitong Mayo 25, 2026.
Ayon sa pulisya, nawalan umano ng preno ang truck na may kargang mga semento at dahil sa matarik pababa ang kalsada ay mabilis itong dumausdos at nasagi ang kaliwang bahagi ng dalawang magkasunod na Asian Utility Vehicle (AUV) na minamaneho ni alyas Michael at alyas Johnlen.
Nabundol din ng truck ang likurang bahagi ng isang Sport Utility Vehicle (SUV) na minamaneho ni alyas Christian at isang sedan na minamaneho ni alyas Erick bago masagi ang isang pampasaherong mini bus na minamaneho ni alyas Jake at nang dakong huli ay sa isa pang pampasaherong modern jeepney na minamaneho naman ni alyas June.
Dahil sa pagkabundol sa SUV, nasagasaan nito ang isang motorsiklo na nasa unahan at naipit sa ilalim ang drayber na si alyas Marson na nagresulta sa pagkasawi nito.
Binundol naman ng sedan ang isang tricycle dahilan para mabangga naman ng tricycle na minamaneho ni alyas Joel ang isang van na minamaneho ni alyas Jerry at nagpang-abot sa pampasaherong mini bus.
Kaagad namang isinugod sa Ynares Hospital ang mga sugatan upang mabigyan ng paunang lunas.
Inaalam pa ng mga awtoridad ang kabuuang halaga ng pinsala samantalang nakakulong pansamantala ang drayber ng truck na si alyas Joel at sasampahan ng kasong damage to property at multiple physical injury.