ISINUSULONG ni Senador Pia S. Cayetano ang pangangailangan para sa sustainable at pinagsamang solusyon sa sektor ng enerhiya at transportasyon upang matulungan ang mga Pilipinong apektado ng tumataas na gastos sa pamasahe at pabagu-bagong presyo ng langis sa pandaigdigang merkado.
Sa paglulunsad ng Iwas Taas Pamasahe E-Transport Solution Program, nagpahayag ng pakikiisa ang senador sa mga drayber, operator, at commuter na nahaharap sa patuloy na pagtaas ng gastos sa transportasyon dulot ng umiiral na sigalot sa Kanlurang Asya.
Binigyang-diin niya ang kahalagahan ng pagprotekta sa sektor laban sa pabago-bagong presyo ng pandaigdigang langis sa pamamagitan ng matatag na seguridad sa enerhiya at makabagong sistema ng transportasyon.
Bilang Chairperson ng Senate Committee on Energy, iginiit ni Cayetano ang mahalagang ugnayan ng energy security at sustainable transportation sa pagbuo ng matatag at inklusibong ekonomiya.
Samantala, bilang pinuno rin ng Senate Committee on Sustainable Development Goals (SDGs), Innovation, and Futures Thinking, binigyang-diin ng senadora ang kahalagahan ng pagsusulong ng transportasyong ligtas, abot-kaya, at naaabot ng lahat.
Nanawagan din siya ng mas matibay na ugnayan sa pagitan ng pambansa at lokal na pamahalaan, pribadong sektor, at mga komunidad upang matiyak na walang Pilipinong maiiwan sa pag-unlad.
“Ito ay hindi lamang tungkulin ng pamahalaan. Ang inobasyon ay dapat isulong sa pamamagitan ng sama-samang pagkilos,” ani Cayetano, habang hinihikayat ang whole-of-nation approach upang mapalawak ang green investments at mapabilis ang transisyon tungo sa malinis at modernong transportasyon.
Sa pamamagitan ng programang ito, inaasahang mabibigyan ng pangmatagalang solusyon ang hamon sa tumataas na pamasahe at makatutulong sa pagtataguyod ng isang mas sustainable at makakalikasang hinaharap para sa bansa. (IZA ALDANA)