ISANG 29-anyos na binata ang pinagbabaril ng mga hindi pa nakikilang suspek habang ito ay nagbi-bisikleta sa kahabaan ng Luis Street sa Barangay San Miguel.
Ayon sa ulat ni PCapt. Richard Tomas, Commander ng Sub-station 6 kay PCol. Hendrix Mangaldan, Chief of Police ng Pasig City, dakong alas-11 kaninang umaga nangyari ang nasabing insidente.
Kinilala ang biktima na si Julius Gutierrez, jobless, walang asawa, at nakatira sa Arboleda Compound, Brgy. San Miguel habang tinutugis pa ang mga suspek.
Ayon sa mga nakasaksi, habang binabagtas ng biktima ang nasabing kalsada ay sinusundan umano ito ng mga suspek at kaagad na pinagbabaril ang binata.
Kaagad namang isinugod sa Pasig City General Hospital (PCGH) ang duguang biktima at binigyan ng paunang lunas.
Ayon sa attending physician na si Dr. Audrey Balad, nasa stable condition na ang biktima ngunit kinailangan pa umanong operahan si Gutierrez sa likod ng kanang balikat nito na tinamaan ng bala.
Sinabi naman ni PCapt. Jean Aguada, tagapagsalita ng Pasig PNP, kasalukuyan pa nilang inaalam ang motibo ng nasabing pamamaril.
